Маҷлиси идона бахшида ба «Рӯзи Модар – 8 март»

Нимаи аввали рӯзи 6 марти соли равон дар суди ноҳияи Исмоили Сомонии шаҳри Душанбе маҷлиси корӣ бахшида ба «Рӯзи Модар – 8 март» доир гардид. Дар ҷаласа Сангинзода Ғайрат – раиси суди ноҳияи Исмоили Сомонии шаҳри Душанбе, Кабирзода Сарфароз – муовини якуми раиси суди ноҳияи Исмоили Сомонии шаҳри Душанбе, Нурализода Сафар – муовини раиси суди ноҳияи Исмоили Сомонии шаҳри Душанбе, судяҳо ва кормандони дастгоҳи суд ва намоянда аз Мақомоти иҷроияи ҳокимияти давлатӣ дар ноҳияи Исмоили Сомонии шаҳри Душанбе иштирок доштанд. Ҳамчунин дар маҷлиси мазкур Раҳмонзода Моҳшариф собиқ муовини якуми раиси суди ноҳияи Исмоили Сомонии шаҳри Душанбе даъват гардида буд.

Маҷлиси мазкурро нахуст раиси суд – Сангинзода Ғайрат кушода, бонувони суд ва дар симои онҳо тамоми модарон, собиқадорон ва бонувони мамлакатро бо фарорасии «Рӯзи Модар – 8 март» муборакбодӣ намуда, қайд карданд, ки модар шахсест, ки шабу рӯз ба хотири роҳату осоиши тифлаш заҳмат мекашад ва намегузорад, ки фарзанди ӯ ранҷу озоре бинад. Вай ҳамеша дар талош аст, ки фарзандаш солиму бардам ба камол расад, соҳиби одобу маърифат, илму дониш ва касбу ҳунар гардад ва дар оянда ба ҷомеа хизмати шоиста намояд. Яъне дар шуури насли наврас ташаккул додани эҳсоси муҳаббат ба донишу маърифат, одобу ахлоқ, нангу номус ва ватандӯстиву заҳматкашӣ, қабл аз ҳама, хизмати модар мебошад. Маҳз ба ҳамин хотир, ҳар як фард модарро мисли ҷони худ ва ҳамчун зиннату сафои зиндагӣ дӯст медорад, азиз мешуморад ва ҳурмату эҳтиромашро ба ҷо меорад. Модар, дар ҳақиқат, сазовори ҳама гуна қадршиносӣ ва дӯстдорӣ мебошад, зеро ӯ меҳрубонтарин инсон барои ҳар як шахс ба шумор меравад.

Сипас Амир Иброҳимзода – мудири Бахши кор бо ҷавонон ва варзиши ноҳияи Исмоили Сомонии шаҳри Душанбе аз номи Раиси ноҳияи Исмоили Сомонии шаҳри Душанбе муҳтарам Самӣ Шариф ва аз номи роҳбарияти Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҳозиринро таҳнияту муборакбодӣ карда, қайд карданд, ки модар ягона мавҷудест, ки инсон меофарад ва тавре ки бузургон гуфтаанд, бо як дасти худ гаҳвора ва бо дасти дигараш сайёраро меҷунбонад. Модарону занон ва бонувони кишвари азизи мо бо рафтори нек, андешаи солим ва маҳорату кордонии худ дар ободиву пешрафти Тоҷикистони маҳбубамон саҳми бузург доранд. Онҳо имрӯз дар ҳамаи соҳаҳои ҳаёти ҷомеа ва давлат софдилона кору фаъолият менамоянд ва бо заҳмати бунёдкоронаву ташаббусҳои созандаашон барои рушди давлати соҳибистиқлоламон саъю талош мекунанд. Нақши занону модарон дар пойдориву устувории оила ва фароҳам овардани фазои орому солим дар хонавода бисёр муҳим мебошад.

Дар охир бонувони суд аз ҷониби раиси суд бо тӯҳфаҳои хотиравӣ ва аз тарафи мудири Бахши кор бо ҷавонон ва варзиши ноҳияи Исмоили Сомонии шаҳри Душанбе Иброҳимзода Амир барои мусоидат дар татбиқи босамари сиёсати давлатии ҷавонон ва рушди соҳаи варзиш, иштироки фаъолона дар баргузории чорабиниҳои фарҳангию фароғатӣ ва маърифатию ахлоқӣ бо сипосномаҳо қадрдонӣ карда шуданд.

 

Суратгузориш аз ҷараёни баргузории ҷаласа: